1 וַיָּקָם וַיֵּלַךְ וִיהוֹנָתָן בָּא הָעִֽיר ׃
2 וַיָּבֹא דָוִד נֹבֶה אֶל ־ אֲחִימֶלֶךְ הַכֹּהֵן וַיֶּחֱרַד אֲחִימֶלֶךְ לִקְרַאת דָּוִד וַיֹּאמֶר לוֹ מַדּוּעַ אַתָּה לְבַדֶּךָ וְאִישׁ אֵין אִתָּֽךְ ׃
3 וַיֹּאמֶר דָּוִד לַאֲחִימֶלֶךְ הַכֹּהֵן הַמֶּלֶךְ צִוַּנִי דָבָר וַיֹּאמֶר אֵלַי אִישׁ אַל ־ יֵדַע מְאוּמָה אֶת ־ הַדָּבָר אֲשֶׁר ־ אָנֹכִי שֹׁלֵֽחֲךָ וַאֲשֶׁר צִוִּיתִךָ וְאֶת ־ הַנְּעָרִים יוֹדַעְתִּי אֶל ־ מְקוֹם פְּלֹנִי אַלְמוֹנִֽי ׃
4 וְעַתָּה מַה ־ יֵּשׁ תַּֽחַת ־ יָדְךָ חֲמִשָּׁה ־ לֶחֶם תְּנָה בְיָדִי אוֹ הַנִּמְצָֽא ׃
5 וַיַּעַן הַכֹּהֵן אֶת ־ דָּוִד וַיֹּאמֶר אֵֽין ־ לֶחֶם חֹל אֶל ־ תַּחַת יָדִי כִּֽי ־ אִם ־ לֶחֶם קֹדֶשׁ יֵשׁ אִם ־ נִשְׁמְרוּ הַנְּעָרִים אַךְ מֵאִשָּֽׁה פ ׃
6 וַיַּעַן דָּוִד אֶת ־ הַכֹּהֵן וַיֹּאמֶר לוֹ כִּי אִם ־ אִשָּׁה עֲצֻֽרָה ־ לָנוּ כִּתְמוֹל שִׁלְשֹׁם בְּצֵאתִי וַיִּהְיוּ כְלֵֽי ־ הַנְּעָרִים קֹדֶשׁ וְהוּא דֶּרֶךְ חֹל וְאַף כִּי הַיּוֹם יִקְדַּשׁ בַּכֶּֽלִי ׃
7 וַיִּתֶּן ־ לוֹ הַכֹּהֵן קֹדֶשׁ כִּי לֹא ־ הָיָה שָׁם לֶחֶם כִּֽי ־ אִם ־ לֶחֶם הַפָּנִים הַמּֽוּסָרִים מִלִּפְנֵי יְהוָה לָשׂוּם לֶחֶם חֹם בְּיוֹם הִלָּקְחֽוֹ ׃
8 וְשָׁם אִישׁ מֵעַבְדֵי שָׁאוּל בַּיּוֹם הַהוּא נֶעְצָר לִפְנֵי יְהוָה וּשְׁמוֹ דֹּאֵג הָאֲדֹמִי אַבִּיר הָרֹעִים אֲשֶׁר לְשָׁאֽוּל ׃
9 וַיֹּאמֶר דָּוִד לַאֲחִימֶלֶךְ וְאִין יֶשׁ ־ פֹּה תַֽחַת ־ יָדְךָ חֲנִית אוֹ ־ חָרֶב כִּי גַם ־ חַרְבִּי וְגַם ־ כֵּלַי לֹֽא ־ לָקַחְתִּי בְיָדִי כִּֽי ־ הָיָה דְבַר ־ הַמֶּלֶךְ נָחֽוּץ ס ׃
10 וַיֹּאמֶר הַכֹּהֵן חֶרֶב גָּלְיָת הַפְּלִשְׁתִּי אֲשֶׁר ־ הִכִּיתָ ׀ בְּעֵמֶק הָאֵלָה הִנֵּה ־ הִיא לוּטָה בַשִּׂמְלָה אַחֲרֵי הָאֵפוֹד אִם ־ אֹתָהּ תִּֽקַּח קָח כִּי אֵין אַחֶרֶת זוּלָתָהּ בָּזֶה וַיֹּאמֶר דָּוִד אֵין כָּמוֹהָ תְּנֶנָּה ׃ לִּֽי
11 וַיָּקָם דָּוִד וַיִּבְרַח בַּיּוֹם ־ הַהוּא מִפְּנֵי שָׁאוּל וַיָּבֹא אֶל ־ אָכִישׁ מֶלֶךְ גַּֽת ׃
12 וַיֹּאמְרוּ עַבְדֵי אָכִישׁ אֵלָיו הֲלוֹא ־ זֶה דָוִד מֶלֶךְ הָאָרֶץ הֲלוֹא לָזֶה יַעֲנוּ בַמְּחֹלוֹת לֵאמֹר הִכָּה שָׁאוּל באלפו וְדָוִד ברבבתו ׃
13 וַיָּשֶׂם דָּוִד אֶת ־ הַדְּבָרִים הָאֵלֶּה בִּלְבָבוֹ וַיִּרָא מְאֹד מִפְּנֵי אָכִישׁ מֶֽלֶךְ ־ גַּֽת ׃
14 וַיְשַׁנּוֹ אֶת ־ טַעְמוֹ בְּעֵינֵיהֶם וַיִּתְהֹלֵל בְּיָדָם ויתו עַל ־ דַּלְתוֹת הַשַּׁעַר וַיּוֹרֶד רִירוֹ אֶל ־ זְקָנֽוֹ ׃
15 וַיֹּאמֶר אָכִישׁ אֶל ־ עֲבָדָיו הִנֵּה תִרְאוּ אִישׁ מִשְׁתַּגֵּעַ לָמָּה תָּבִיאוּ אֹתוֹ אֵלָֽי ׃ חֲסַר מְשֻׁגָּעִים אָנִי כִּי ־ הֲבֵאתֶם אֶת ־ זֶה לְהִשְׁתַּגֵּעַ עָלָי הֲזֶה יָבוֹא אֶל ־ בֵּיתִֽי ס ׃