1 מִזְמוֹר לְדָוִד יְהֹוָה מִי ־ יָגוּר בְּאָהֳלֶךָ מִֽי ־ יִשְׁכֹּן בְּהַר קָדְשֶֽׁךָ ׃
2 הוֹלֵךְ תָּמִים וּפֹעֵל צֶדֶק וְדֹבֵר אֱמֶת בִּלְבָבֽוֹ ׃
3 לֹֽא ־ רָגַל ׀ עַל ־ לְשֹׁנוֹ לֹא ־ עָשָׂה לְרֵעֵהוּ רָעָה וְחֶרְפָּה לֹא ־ נָשָׂא עַל ־ קְרֹֽבוֹ ׃
4 נִבְזֶה ׀ בְּֽעֵינָיו נִמְאָס וְאֶת ־ יִרְאֵי יְהוָה יְכַבֵּד נִשְׁבַּע לְהָרַע וְלֹא יָמִֽר ׃
5 כַּסְפּוֹ ׀ לֹא ־ נָתַן בְּנֶשֶׁךְ וְשֹׁחַד עַל ־ נָקִי לֹא לָקָח עֹֽשֵׂה ־ אֵלֶּה לֹא יִמּוֹט לְעוֹלָֽם ׃