1 מִזְמוֹר שִׁיר לְיוֹם הַשַּׁבָּֽת ׃
2 טוֹב לְהֹדוֹת לַיהוָה וּלְזַמֵּר לְשִׁמְךָ עֶלְיֽוֹן ׃
3 לְהַגִּיד בַּבֹּקֶר חַסְֽדֶּךָ וֶאֱמֽוּנָתְךָ בַּלֵּילֽוֹת ׃
4 עֲֽלֵי ־ עָשׂוֹר וַעֲלֵי ־ נָבֶל עֲלֵי הִגָּיוֹן בְּכִנּֽוֹר ׃
5 כִּי שִׂמַּחְתַּנִי יְהוָה בְּפָעֳלֶךָ בְּֽמַעֲשֵׂי יָדֶיךָ אֲרַנֵּֽן ׃
6 מַה ־ גָּדְלוּ מַעֲשֶׂיךָ יְהוָה מְאֹד עָמְקוּ מַחְשְׁבֹתֶֽיךָ ׃
7 אִֽישׁ ־ בַּעַר לֹא יֵדָע וּכְסִיל לֹא ־ יָבִין אֶת ־ זֹֽאת ׃
8 בִּפְרֹחַ רְשָׁעִים ׀ כְּמוֹ עֵשֶׂב וַיָּצִיצוּ כָּל ־ פֹּעֲלֵי אָוֶן לְהִשָּֽׁמְדָם עֲדֵי ־ עַֽד ׃
9 וְאַתָּה מָרוֹם לְעֹלָם יְהוָֽה ׃
10 כִּי הִנֵּה אֹיְבֶיךָ ׀ יְֽהוָה כִּֽי ־ הִנֵּה אֹיְבֶיךָ יֹאבֵדוּ יִתְפָּרְדוּ כָּל ־ פֹּעֲלֵי אָֽוֶן ׃
11 וַתָּרֶם כִּרְאֵים קַרְנִי בַּלֹּתִי בְּשֶׁמֶן רַעֲנָֽן ׃
12 וַתַּבֵּט עֵינִי בְּשׁוּרָי בַּקָּמִים עָלַי מְרֵעִים תִּשְׁמַעְנָה אָזְנָֽי ׃
13 צַדִּיק כַּתָּמָר יִפְרָח כְּאֶרֶז בַּלְּבָנוֹן יִשְׂגֶּֽה ׃
14 שְׁתוּלִים בְּבֵית יְהוָה בְּחַצְרוֹת אֱלֹהֵינוּ יַפְרִֽיחוּ ׃
15 עוֹד יְנוּבוּן בְּשֵׂיבָה דְּשֵׁנִים וְרַֽעֲנַנִּים יִהְיֽוּ ׃ לְהַגִּיד כִּֽי ־ יָשָׁר יְהוָה צוּרִי וְֽלֹא ־ עלתה ׃ בּֽוֹ